يا ترى ايه حكاية تقرير وكالة فيتش اللى بيتوقع ان 2025 هتكون وش السعد على مصر؟ وهل السنة الجاية ممكن فعلا يكون العام اللي مصر تتحول فيه لمحطة جذب استثماري عالمي؟ وإزاي الاستثمارات الأجنبية ممكن تنقذنا من أزمة نقص العملة؟ وهل فعلًا الاقتصاد المصري على أعتاب انتعاشة جديدة؟
وكالة "فيتش" أصدرت مؤخرا تقرير مهم جدا توقعت فيه إن مصر هتشهد دفعة قوية من الاستثمار الأجنبي المباشر في 2025.. التقرير ده جاي بعد ما فيتش شافت إشارات إيجابية بتحصل زي تحسن التصنيف الائتماني لمصر مؤخرًا وتراجع ضغوط التمويل الخارجي على الاقتصاد
وحسب التوقعات الاستثمارات الأجنبية اللي جاية لمصر مش أرقام على ورق لأ فلوس حقيقية هتدخل البلد وهتساهم في علاج واحدة من أكبر المشاكل اللي بتواجهنا حاليًا نقص العملة الأجنبية.. وده بيدينا أمل إن السوق المصري يرجع تاني لسابق عهده ويستعيد توازنه
(إزاي ده هيحصل؟)
"طيب، إيه اللي هيخلي المستثمرين ييجوا؟
التقرير قال إن استمرار الإصلاحات الاقتصادية في مصر هو المفتاح.. الإصلاحات دي مش بس بتطمن المستثمرين لكنها كمان بتفتح الباب لتدفقات من جهات مختلفة زي تدفقات المحافظ والتدفقات متعددة الأطراف.. وكمان رفع التصنيف السيادي لمصر الفترة اللي فاتت كان إشارة واضحة إن الاقتصاد المصري قدر يتماسك رغم الظروف الصعبة وده اللي شجع وكالات زي "فيتش" إنها ترفع تصنيف 4 بنوك مصرية كبيرة كمان يعني ببساطة الثقة بترجع وحدة وحدة
بس برضه التقرير كان صريح وقال إننا لسه قدامنا تحديات منها مثلًا تراجع إنتاج الغاز اللي كان مصدر دخل مهم جدًا للعملة الأجنبية واحتمال استمرار انخفاض إيرادات قناة السويس لو استمرت التوترات العالمية والركود الاقتصادي وكمان العجز الكبير في الحساب الجاري اللي محتاج شغل كتير عشان يتظبط
طب ليه برغم كل ده "فيتش" عندها أمل كبير في 2025 ؟
لأنها شايفة إن استقرار الإصلاحات وزيادة الاستثمارات الأجنبية هيكونوا عوامل أساسية لتحسين وضع الاقتصاد.. ده غير إن المشاريع القومية اللي بتتعمل زي تطوير البنية التحتية والطاقة ممكن تخلي مصر وجهة جذابة للمستثمرين من كل حتة في العالم
طب إزاي الاستثمارات دي هتحل أزمة العملة؟
الفكرة ببساطة إن لما المستثمرين ييجوا هيضخوا عملات أجنبية في الاقتصاد المصري وده هيزود احتياطي النقد الأجنبي في البنك المركزي وهيقلل الضغط على الجنيه قدام الدولار.. وده معناه إننا ممكن نشوف استقرار أكتر في سعر الصرف وبالتالي أسعار أقل واستيراد أسهل
التحدي الأكبر دلوقتى عند الحكومة .. هل فعلاً هنقدر نستغل الفرصة دي ونجذب استثمارات تحقق طفرة اقتصادية ولا ممكن تضيع زي فرص كتير ضاعت مننا قبل كده .. الإجابة متعلقة باستمرارنا في الإصلاحات وثقتنا في قدرتنا على التغييروفى الاجراءات اللى هناخدها لحل المشاكل الكبيرة اللى بيعانى منها الاقتصاد
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
