مفاجآت مدوية عن الدولار وسعر الصرف و "وهم عودة ...

 
المصرفي المخضرم هشام عز العرب قال أهم كلام ممكن يتقال في قصة الدولار اللي شاغله المصريين وحسم مصير اسعار العملات في البنوك وحط النقط على الحروف وكشف المستور ومين وراء الاشاعات اللي بتتقال في الأسواق عن الدولار.. عز العرب قال ايه.. تعالو نشوف إيه الحكاية وازاي كلامه ممكن يغير نظرة ناس كتير للأمور .

 
اكتر حاجة ممكن توقع اي دولة هي الإشاعات والتحليلات المدفوعة لصالح أجندات سوداء وياما دول وقعت عشان مشيت وراء إشاعة ولسه مش عارفة توقف على رجليها من تاني ومصر من اكتر دول العالم اللي بتطلع فيها اشاعات مقصودة وممولة كمان ومدفوع فيها فلوس كتير جدا لأن الناس دي عارفة بتعمل إيه من الاخر لأن المقصود مش الدولار بس .. لكن البلد كلها.. الأغرب في الحكاية أن الدولار بيرتفع قدام اتخن عملات في العالم ومحدش بيتكلم في الدول دي لأن دا عرف السوق وطبيعي لقوة الدولار عالميا وفي وقت فاز فيه رئيس أمريكي بيدعم الدولار في اقوى اقتصاد على مستوى الكوكب لكن الوضع بيختلف لما يكون ليه علاقة بالجنيه المصري وكأنه العملة الوحيدة اللي في العالم اللي بتنزل قدام الدولار.

المصرفي الكبير هشام عز العرب رئيس مجلس إدارة البنك التجاري الدولي CIB الحقيقة قال كلام مهم جدا لخص بيه حكاية الدولار ومفيش كلام بعده لما قال واستغرب وسأل هي ليه الناس رابطة الدولار بكرامة الدولة وقال إن الدولار  عبارة عن  أداة مالية واقتصادية وان ربطها بكرامة مصر خطأ كبير وغير منطقي طبعا ولازم نتخلص من العقدة دي وتحركات الدولار قدام الجنيه طبيعية تماما زي تحركات الدولار قدام أي عملة تانية ولما الدولار بيرفع قدام الين الياباني السوشيال ميديا هناك مش بتاخد الموضوع على أنه كرامة الين وكرامة اليابان.. دي أسواق ياجماعة والمؤشرات كل دقيقه في حتة يعني مفيهاش مشكلة.

الأهم في اللي قاله عز العرب في الساعات الأخيرة ان أي تحرك لسعر الدولار دلوقتي طبيعي وفي حدود السوق والأمان وبقي شيء صحي كمان لأنه بيأكد إن سوق الصرف بقي حر ومرن وبيدي رسالة للمستثمرين أن سوق الصرف في مصر مش عليه وصاية ولا توجيه ..

طيب ما سألتش نفسك ليه الحرب على الجنيه المصري دلوقتي بالذات؟
شوف عشان تفهم الصورة وتستوعب المشهد كويس طالما هتلاقي هجوم على الدولة والاقتصاد والدولار بالذات يبقي انت ماشي صح ولو متابع هتعرف أن الحملات دي بتطلع مع كل انتعاشة اقتصادية أو تحسن في المؤشرات أو صدور شهادات دولية إيجابية عن مصر ولو لاحظنا هتلاقي إن الحملات دي زادت بعد تعديل تصنيفات وكالة فيتش وموديز للاقتصاد المصري بشكل إيجابي ولعدد من البنوك المصرية وحتى كمان بعد فرحة المصريين بعودة شركة النصر للسيارات والقلاع الصناعية اللي كانت مقفولة والصحوة في القطاع الصناعي عموما وصفقات الاستثمار الجديدة.. عشان كده لا م نفهم وكلام عز العرب كان عشان يفوقنا وينبهنا إن تجار العملة مثلا هما اكتر ناس بتحاول ترجع وتخلق أزمة دولار في البلد من تاني عن طريق الاشاعات والذباب الالكتروني ودا بعد ما البنك المركزي قضى على كل أمل ليهم في العودة .

على فكرة تجار العملة دول مش الأشخاص اللي بتوقف على ناصية أو في كشك عشان تبدل معاك العملة زي ماكانو بيظهروا في الافلام لا طبعا دول شكلهم اتغير وبقوا مافيا وعصابات وكيانات منظمة وليهم اتصالات بأطراف خارجية وكسبو مليارات من جيوب الناس واستغلوا زنقة البلد في وقت من الأوقات وكان وراهم مخطط اكبر وهو تجريف مصر من الدولار عشان متلقيش عملة تستورد بيها السلع الأساسية وتستنزف الاحتياطي ويبقي اقتصادها مكشوف  والحل في تحويل الدولار لفزاعة ترعب المصريين.