إيه مصير شهادات الادخار ذات العائد المرتفع في البنوك بعد قرار البنك المركزي بتثبيت سعر الفايدة وياترى البنوك هتلغيها بعد القرار ولا هتفضل زي ما هي .. وهل فيه شهادات تانية بفايدة اعلي هتنزل قريب.. شوف التقرير للآخر وهتعرفوا التفاصيل
البنوك طرحت شهادات ادخار بعائد مرتفع يصل 27% و 23.5% وده كان في وقت من الأوقات لسحب السيولة من المواطنين للسيطرة على التضخم بمعنب أن الحكومة اغرت أصحاب المدخرات واللي معاهم سيولة زيادة بالشهادات دي عشان يحطوا فلوسهم في البنوك عن طريق الشهادات دي لأن طول ما فيه سيولة زيادة مع المواطنين دا هيرفع التضخم والاسعار بسبب استخدامها في شراء السلعة.
طيب إيه مصير شهادات الادخار ذات العائد المرتفع بعد قرار المركزي بتثبيت الفايدة ؟
شوف ياسيدي لغاية دلوقتى مفيش اي قرار رسمي من البنوك بخصوص شهادات الادخار اللي بفايدة عالية يعني الشهادات زي ما هي في البنوك وبتصرف عادي كل شهر ودا اللي أكدته مصادر لبانكير في بنوك الأهلي ومصر واللي أكدوا ان شهادات الادخار ذات العائد المرتفع 27% و 23.5% لم يتم إغلاقها حتي الآن.
والمصادر نفسها أكدت إن جان الأصول والخصوم بتعمل بدراسة السوق واحتياجاته لحظة بلحظة دلوقتي ولو شافت إن فيه حاجة لاي تعديل في شهادات الادخار ذات العائد المرتفع هيتم مناقشته ونفت المصادر في نفس الوقت وجود أي اتجاه لزيادة أسعار الفائدة على الأوعية الادخارية وأنه مفيش اتجاه لإصدار شهادة ادخار بفائدة 35%.
وبنفكركم إن لجنة السياسة النقدية للبنك المركزى المصري في اجتماعها أمس الخميس اللي فات قررت تثبيت سعري عائد الإيداع والإقراض لليلة واحدة وسعر العملية الرئيسية للبنك المركزي عند 27.25% و28.25% و27.75% على الترتيب وكمان قررت الإبقاء على سعر الائتمان والخصم عند 27.75%.
طيب إيه ميزة الاستثمار في شهادات الادخار بالبنوك ؟
شوف حضرتك الاستثمار في شهادات الادخار خاصة اللي بفايدة عالية ليه مميزات كتير جدا أولها انك بتوفر جهدك ووقتك وبتحط فلوسك في مشوار واحد للبنك وبعدها بتقبض مبلغ محترم كل شهر او حسب اتفاقك مع البنك وتاني حاجة إن فلوسك في أمان تام وبضمان البنك المركزي المصري يعني مفيش خوف عليها وتالت حاجة بعد انتهاء مدة الشهادة بتاخد فلوسك اللي دفعتها وكمان تقدر تاخد قرض بضمان الشهاده وباجراءات بسيطة جدا وفي نفس الوقت البنوك بتستفاد من عائدات شراء الشهادات دي في استثمارها في قطاعات الاقتصاد المصري يعني انت بتستفاد والدولة بتستفاد واكيد البنوك بتستفاد.
طيب ليه البنوك بتفكر تلغي شهادات الادخار ذات العائد المرتفع أو تقلل فائدتها في وقت من الأوقات ؟.
عشان نبقى عارفين بردو إن النوع دا من الشهادات اللي فايدتها عالية بتكلف البنوك مبالغ كبيرة وهي الفايدة اللي حضرتك بتروح تقبضها اخر الشهر ودا غير اصل المبلغ اللي بتسترده في نهاية مدة الشهادة ودا بيقلل مكاسب البنوك وعشان كده بتلجأ مع استقرار الأوضاع ومع تخفيض المركزي للفايدة أو تثبيتها لالغاء الشهادات دي او خفض الفايدة بتاعها
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
