زيادة أسعار كروت الشحن وباقات الإنترنت بقت ترند وحديث المصريين في الساعات الأخيرة ولسه الكلام مستمر بعد موافقة الجهاز القومي لتنظيم الاتصالات على تطبيق الزيادة خلال الفترة الجاية ودا بعد تقدم شركات الاتصالات لأكتر من مرة بطلبات لزيادة كروت الشحن واللي قالت إن اسعارها الحالية مش مناسبة مع ارتفاع تكاليف التشغيل والتضخم، بخلاف الزيادات الأخيرة في أسعار الطاقة واللي أثرت بشكل كبير على نفقات الشركات.
وعشان نبقى عارفين لسه مفيش اي إعلان رسمي بالاسعار الجديدة أو نسبة الزيادة في أسعار كروت الشحن والانترنت ولما يحصل هيكون فيه إعلان رسمي بكل الأسعار عشان محدش يستغل الموقف ويبيع بأسعار أعلى.
طيب إيه حكاية الأسعار اللي بتتقال في مواقع التواصل الاجتماعي والسوشيال ميديا حاليا ؟
دي كلها توقعات وتكهنات وتسريبات ملهاش اي سند رسمي وجهاز تنظيم الاتصالات زي ما قلنا لسه ما اعلنش اي أسعار لغاية دلوقتى ولسه فيه مفاوضات مع الشركات للوصول لأسعار عادلة وهيتم الإعلان عنها وحسب التكهنات فالزيادة الجديدة ممكن تكون بنسبة 15% في أسعار كروت الشحن والانترنت .
وفيه تكهنات وتوقعات تانية بتقول إن الأسعار هتزيد بنسبة 30% عن الأسعار الحالية لكن الأرجح أن الزيادة هتكون 15% مراعاة لظروف المستهلك ..
ولو أقرت الزيادة 15% مثلا كارت الشحن فئة 100 جنيه كان بيدي رصيد فعلى قبل الزياده الجديدة 70جنيه وبعد الزيادة هيديك رصيد 55 جنيه .
وكارت ال50 جنيه بيدي رصيد حاليا 35 جنيه وبعد الزيادة المقررة هيديك 27.5 جنيه.
وبخصوص الزيادة المتوقعة على أسعار باقات الانترنت فسعر باقة سوبر 140 جيجابايت اللي كانت بـ182.40 جنيهًا شهريًا، بعد إضافة ضريبة القيمة المضافة هيوصل سعرها 210 جنيه تقريبا..
وسعر باقة سوبر 200 جيجابايت 256.5 جنيهًا شهريًا الحالية بعد إضافة ضريبة القيمة المضافة هيوصل سعرها 290 جنيه تقريبا..
وخلىي بالك الشحن من تطبيقات الدفع الالكتروني مثلا هيكون أقل من الشحن من فوري مثلا لأن الشركة بتاخد عمولة بتضاف على سعر كل كارت
شركات الاتصالات هتحاول طبعا تقديم بعض العروض والحزم الترويجية لجذب المستهلكين والحفاظ على قاعدة عملائها بعد زيادة أسعار كروت الشحن.
موعد زيادة أسعار كروت الشحن وباقات الموبايل والإنترنت مش هتقل عن 3 شهور جاية ودا حسب كلام شعبة الاتصالات وان تحديد الموعد الرسمي هو من مسؤولية القومي للاتصالات
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
