قرار مهم من وزارة "التموين".. إيه اللي هيحصل الأيام الجاية

هي ايه قصة القرار الجديد لوزارة التموين، وهل هو يخص منظومة الدعم ولا هيكون بخصوص مشروعات جديدة هتعملها قريب، وامته هنشوف بشاير القرار ده على أرض الواقع.. هنقولك كل التفاصيل في الفيديو ده فتابعنا للآخر.

الدكتور شريف فاروق، وزير التموين والتجارة الداخلية، أكد إن الوزارة بتتجه دلوقتي لإعادة هيكلة منظومة الدعم، وده طبعا الهدف منه تحقيق النفع لكل المواطنين المستفيدين من منظومة الدعم.

وطبعا، هيكلة الدعم هتم على ايد الوزارة وبمشاركة أصحاب كل المنشآت التموينية بما فيها المطاحن والمخابز وبدالي التموين ومنافذ مشروع جمعيتي، واللي هتشتغل كلها في خدمة المواطن المصري صاحب الحق الأصيل في المنظومة دي.

عشان كده، وزير التموين اجتمع مع عبدالله غراب رئيس الشعبة العامة للمخابز، وهانى مكى سكرتير الشعبة، عشان ينظموا تفعيل القرار على أرض الواقع.

ونقدر نقول، إن وزارة التموين مهتمة جدا تسمع رأي أصحاب المخابز ومقترحاتهم ومطالبهم قبل ما تعمل هيكلة للدعم، واللي هتتفق مع توجه الوزارة وبتهدف في المقام الاول لتأكيد حرص الدولة ممثلة في وزارة التموين بالتعاون مع كل الشركاء المعنيين بمنظومة الخبز، على الارتقاء بمستوى الخدمات التموينية المقدمة للمواطنين، واللي طبعا في مقدمتها الارتقاء بجودة رغيف الخبز المقدم للمواطن، وكمان التأكيد على استمرار عمل المخابز البلدية بشكل منتظم ومستقر.

أما بالنسبة لمطالب ومقترحات الشعبة العامة للمخابز، فكانت بتتمحور في الحفاظ على كافة أطراف المنظومة بما فيها أصحاب المخابز بصفتهم مقدمي خدمات المواطنين ، وحصولهم علي الخبز بجودة عالية، وهو ده الهدف الاستراتيجي اللي بتسعي له الدولة دايما، خاصة وأنها بتحرص على الحفاظ على المكتسبات اللي اتحققت للمواطن المصري وصاحب المخبز من بداية تطبيق منظومة الخبز البلدي المدعم.

وكانت أهم المطالب والمقترحات اللي اتقدمت بها الشعبة كمان  تحسين جودة الدقيق لضمان إنتاج رغيف خبز مطابق للمواصفات، والتأكيد على شركات البطاقات الذكية بتحسين مستوى الخدمات الذكية المقدمة، وده كله عشان يساهم في انتظام عمل المنظومة بالسرعة والكفاءة المطلوبة، عشان نضمن تقديم الخدمة للمواطنين بكل سهولة ويسر.

نقدر نقول كمان، إن تفعيل دور لجان التظلمات بمديريات التموين كان من أهم الأهداف اللي اتناقشت، وده عشان يتم النظر في أي طلبات أو تظلمات ممكن يتقدم بها أصحاب المخابز.

والمطالب دي تلقاها الدكتور شريف فاروق وزير التموين والتجارة الداخلية، باهتمام كبير، وأكد أن هيكون في رقابة مشددة على كل المطاحن في القطاعين العام والخاص، عشان تضمن إنتاج دقيق مطابق للمواصفات ولكافة المعايير المعتمدة، سواء جودة عالية أو الوزن والسعر المقرر وكل المواصفات المطابقة، وطبعا كل ده عشان الوزارة تقدم رغيف خبز على أعلى مستوى للمواطن.