لو ناوي تتجوز وعايز تاخد قرض تروح بنك إيه، والبنك ممكن يديك كام، وإيه هي الإجراءات المطلوبة.. هنقولك كل التفاصيل في الفيديو ده فتابعنا للآخر.
دلوقتي، بنك ناصر التابع لوزارة التضامن الاجتماعي، بيقدم مساعدات كتيرة للمواطنين الأكتر احتياجا، عشان يساعدهم على تلبية احتياجاتهم الأساسية من متطلبات الحياة.
ومن أهم الخدمات دي، القروض الاجتماعية الحسنة، واللي بتدي فرصة للعملاء للحصول على قروض تساعدهم على قضاء احتياجاتهم.
ومن أهم القروض اللي بيتيحها البنك للعملاء، قرض الجواز، لأنه من أهم الوسائل اللي بيستخدمها البنك في تقديم خدمات اجتماعية مميزه لفئات المواطنين اللي بتعجز مواردهم الذاتية عن مواجهة الظروف الاجتماعية المتعددة.
وبتُمنح القروض الاجتماعية دي بحد أقصى 10 آلاف جنيه وبدون فوائد وبمصاريف إدارية بسيطة، وبتسدد على أقساط شهرية لمدة 3 سنين.
أما الفئات المستحقة لقرض الزواج من بنك ناصر، هم أصحاب المرتبات، وأصحاب المعاشات، وورثة المعاشات.
كمان في عدد من الشروط المطلوبة للحصول على قرض الزواج من بنك ناصر، وهي، إن في حالة الاقتراض بضمان المرتب، لازم تكون قضيت مدة خدمة 3 سنين، كمان لازم تقدم ضامن من العاملين بالجهاز الإداري للدولة، وتحول القسط أو المرتب علي البنك.
وفي حالة الاقتراض بضمان المعاش أو المعاش المستحق، لازم يتم تحويل القسط أو المعاش علي البنك، وفي حالة المعاش المستحق فبيتم تقديم ضامن من العاملين بالجهاز الإداري للدولة.
طب إيه هي إجراءات الحصول على قرض الزواج من بنك ناصر؟
أولها إن حضرتك تقدم صورة بطاقة الرقم القومي للمقترض والضامن على أن تكون سارية، وكمان تقدم الرقم التأميني للمقترض والضامن والمستفيد، وماتنساش بيان بمفردات المرتب أو المعاش للمقترض ومرتب الضامن.
ضيف على كل ده، إنك لازم تقدم أصل وثيقة عقد قران بالنسبة للمسلمين أو محضر الخطبه للطوائف المسيحية، بشرط ماتزدش مدته عن 7 سنين، ولازم يكون عقد الجواز معمول بمحضر الخطبة بالنسبه للطوائف المسيحية
ولو أنت ناوي تتجوز وتاخد قرض من بنك ناصر، لم ورقك واطلع على أقرب فرع.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
