إيه اللي قاله مصطفي مدبولي في الساعات الأخيرة وإيه كان يقصد بالمربع صفر.. وإيه حكاية التعويم الجديد.. وهل ارتفاع الدولار ليه علاقة بارتفاع أسعار الدولار في الايام الأخيرة .. تابعونا في الفيديو للأخر وهنقولكم على كل التفاصيل.
الدكتور مصطفى مدبولى، رئيس مجلس الوزراء، قال تصريحات كتير على مدار الايام اللي فاتت أغلبها عن الوضع الاقتصادي ومن بين اللي قاله إن الدولة المصرية ملتزمة باستمرار بتطبيق سعر الصرف المرن واللي بيعتمد على العرض والطلب في البنوك ودا بالتنسيق مع البنك المركزى وفسر كلامه إن العودة للسعر الموجه للجنيه هيضيع مكتسبات كتير اتحققت فى الشأن الاقتصادي والحقيقة الدكتور مدبولي استخدم مصطلح خاص لما قال إن عدم الالتزام بالسعر المرن هيرجعنا إلى المربع صفر.
طيب إيه مناسبة كلام مدبولي عن سعر صرف الجنيه دلوقتي؟
الحقيقة كلام مدبولي كان ضمن اجتماعه الأخير مع مديرة صندوق النقد الدولي واللي زارت مصر مؤخرا عشان تبحث مطالب الحكومة المصرية الجديدة واللي كانت بضوء أخضر من الرءيس السيسي واللي وجه الحكومة بمراجعة برنامج الصندوق بحيث ما يمثلش ضعط أكبر على المواطنين ولان فيه ناس فهمت غلط إن توجيهات الرئيس معناها العودة للتحكم في سعر الجنيه أمام الدولار في الفترة الجاية وعشان كده مدبولي طلع وحسم الموضوع دا؟
وايه علاقة الكلام دا بالتعويم؟
عشان في نفس الوقت فيه فريق تاني قال إن الحكومة هتحرك أو هترفع سعر الدولار تاني عشان صندوق النقد وإن سعره دلوقتي مش هو السعر الحقيقي وطبعا الكلام دا مش منطقي بالمرة لان سعر الدولار بيخضع فقط للعرض والطلب في البنوك ودا بشهادة وكالة فيتش للتنصيف الائتماني وصندوق النقد نفسه وطالما سعر الدولار مرن وعرض وطلب يبقي مفيش حاجة اسمها تعويم جديد وكمان مفيش أي علاقة بين كلام مدبولي وبين الارتفاع الاخير للدولار وتخطيه حاجز ال49 جنيه ودا تحرك طبيعي ضمن قواعد سوق الصرف ومن غير أي تدخل حكومي أو من البنك المركزي.
وبمناسبة سعر الدولار خبراء كتير اتكلموا في الموضوع دا وكتير منهم أكد إنه لو مكنش فيه برنامج الإصلاح الاقتصادي للحكومة المصرية مع صندوق النقد الدولي من سنة 2016 كان سعر الدولار هيتراوح بين 100 و120 جنيها خاصة مع ارتفاع أسعار السلع الأساسية والأدوية 3 أضعاف الأسعار الحالية
خبراء الاقتصاد وضحوا نقطة مهمة جدا كمان لما قالوا إن صندوق النقد الدولي مفيش مرة طلب رفع سعر الصرف أو زيادة سعر الدولار لكن كان دايما بيطالب باتاحتة العملات وفق سياسة العرض والطلب وفق سعر رسمي بالبنوك يعني لازم نكون واعيين إن اللي بيحصل في سوق الصرف دا طبيعي وخاصة إن فيه توقعات من شيوخ العاملين في البنوك المصرية قالوا إن سعر الورقة الخضراء هينحصر لفترة بين 48 و50 جنيه قبل ماياخد رحلة هبوط مع تحسن الموارد الدولارية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
