البيض سعره غلي والمواطن صوته عِلي.. قالو الانتاج قليل والكتاكيت ماتت من الحر.. طيب نستورد.. لا ماينفعش نستورد.. دي باختصار معركة البيض الحالية بين الحكومة والتجار واللي مش عاجبهم قرار الاستيراد عشان مكسبهم الكبير هيقل ومش هيعملو ملايين كل طلعة صبح.. تعالو نشوف ايه الحكاية..
البيض زي سلع كتير سعره زاد الفترة اللي فاتت لكن الزيادة كانت كبيرة ومش طبيعية ولما الناس اشتكت التجار قالت إن سبب الارتفاع موت الكتاكيت واللي كانت هتبقي امهات وتبيض.. طيب إيه اللي موت الكتاكيت ياتجار.. الحر لما الكهربا كانت بتقطع.. طبعا دا كلام مش حقيقي ولا يدخل عقل أي بني آدم والحقيقة هي إن الانتاج وفير جدا لكن متخزن ومش بيوصل الناس والتجار بينقطو السوق عشان يحافظوا على حالة الغلاء في الأسعار ويحققوا ملاييين الملايين كل يوم من جيوب المواطن.
الحكومة قررت تضرب تحت الحزام هي كمان وقررت تستورد بيض من بره ودي حالة متكرررتش من سنين ودا عشان تخلق توازن في السوق.. طيب كويس.. لأ مش كويس.. لان قرار الحكومة معجبش التجار الكبار اللي في السوق واللي طبعا مكسبهم هيقل وهيضطروا يوزعوا كميات البيض المتخزن عندهم وبكده ممكن يخسروا.. الأغرب بقي إن التجار مش راضيين يخفضوا السعر عشان الحكومة توقف الاستيراد
عبدالعزيز السيد، رئيس شعبة الثروة الداجنة بغرفة القاهرة التجارية، خلص ذمته وطلع وقال إن كبار المنتجين رافضين خفض الأسعار حتى بعد دخول البيض المستورد للسوق، واتهم التجار بالسيطرةعلى السوق وممارسة الاحتكار.
السيد قال إن كرتونة البيض كانت بتتباع في المزرعة بـ167 جنيه وبعد وصول البيض التركي انخفض السعر لـ155 جنيه ودا دليل على أن ارتفاع الأسعار ملهوش مبرر اقتصادي، لكن نتيجة لسيطرة مجموعة محددة على السوق.
رئيس الشعبة طالب كمان الدولة بالتدخل لكسر احتكار التجار حتى لو الموضوع هيوصل لإلغاء تراخيص المزارع اللي بترفض خفض الأسعار وتشجيع المنافسة في السوق، وقال إن كبار منتجي البيض رافضيت إدخال دورات جديدة عشان يحافظو على ارتفاع الأسعار.
تفتكر أزمة البيض هتنتهي على إيه ومين اللي هينتصر في الاخر الحكومة ولا التجار
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
