ايه اللي هيحصل في سوق السيارات بعد قرار البنك المركزي بإعادة تدبير العملة لاستيراد السلع الغير أساسية وازاي القرار دا هيعمل قلبان في الأسعار الفترة الجاية.. خليكم معانا للآخر وهتعرفوا التفاصيل.
كلنا عارفين إن سوق السيارات في مصر بيعاني من أزمات كتيرة ملهاش اخر وأخطرها وقف الاستيراد بسبب دخول السيارات في جدول السلع الترفيهية أو الغير أساسية ودا كان بهدف توفير وترشيد الدولار وقت أزمة العملة الأجنبية اللي عاشتها مصر بداية من 2022 بعد الأزمة الروسية الأوكرانية وخروج الأموال الساخنة وظهور السوق السوداء والمضاربات في العملة الأجنبية ومن ساعة قرار حظر استيراد السيارات الأخير رجعت أسعار السيارات تقفز من تاني بعد ما استقرت شوية بعد قرار التعويم في مارس اللي فات ورجع الأوفر برايس والاسعار ولعت من تاني وحصل ركود كبير بسبب الارتفاع الكبير في الأسعار بعد ما وصلت الأرقام لمستويات قياسية غير مسبوقة زيرو ومستعمل.
طيب ايه اللي حصل في الساعات الأخيرة في سوق السيارات ؟
لو متابع هتعرف أن البنك المركزي المصري وجه لأول في الساعات الأخير البنوك العاملة في مصر بتدبير الدولار للاعتمادات المستندية لاستيراد السلع غير الأساسية اللي بيتطلب استيرادها موافقة مسبقة منه، وفق مراكز الدولار في كل بنك، ودا اكده مصرفبين لوكالة "الشرق"
ومن بين المصادر دي رئيس تنفيذي لأحد البنوك الخاصة في مصر، واللي أكد إن المركزي المصري وجه البنوك الخميس اللي فات بتدبير الدولار لتمويل كافة السلع غير الأساسية المتراكمة من 2022 و2023 ومنذ بداية 2024 وحتى الآن وقال ان المركزي خاطب مصرفه لتدبير العملة الأجنبية لكافة طلبات الاستيراد المعلقة للسلع غير الأساسية دون استثناء، بما فيها السيارات..
طيب دا معناه إيه ؟
من غير تفكير دا معناه أن الاستيراد هيرجع تاني للسيارات والمعروض هيزيد والاسعار هتبدأ تنزل والاوفر برايس هيختفي من تاني وكل ما زاد المعروض كل ما الأسعار ما نزلت وعلى فكرة لو بدأ الاستيراد بكرة الأسعار مش هتنزل على طول ودا بسبب أن فيه طلب متراكم كبير في السوق على السيارات ولغاية ما السوق يستوعب ويلبي الطلبات دي الأسعار هتنزل بوتيرة بطيئة لغاية الوصول لنقطة التوازن بين العرض والطلب وبعدها يزيد المعروض وهنا الأسعار هتنزل بشكل كبير جدا حسب قواعد السوق وعشان كده لو بتفكر تشتري عربية يبقي اصبر شوية عشان توفر فلوس اكتر.
طيب ايه اللي خلي المركزي يرجع ويوافق على استيراد السيارات وباقي السلع الغير أساسية ؟
اكيد السبب الرئيسي هو توافر الدولار في البنوك ووجود مخزون معقول من العملة الأمريكية وإن خطر شح العملة زال ودا اللي أكدته وكالة فيتش وصندوق النقد الدولي في تقاريرهم الأخيرة ودا معناه أن مفيش عواىق دلوقتي في الاستيراد.
وبخصوص السلع الترفيهية اللي هيرجع المستوردين يجبوها فهي السيارات كاملة الصنع، والهواتف المحمولة وكمالياتها، ونباتات وبذور غذائية، والفواكه الطازجة، والكاكاو، والمجوهرات واللؤلؤ، والتلفزيونات والأجهزة الكهربائية، والملابس الجاهزة، ولعب الأطفال، والإطارات المستعملة، والمفروشات، والأثاث، فضلاً عن المعدات التقيلة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
