وكالة فيتش للتصنيف الائتماني طلعت تقرير رفعت فيه تصنيف مصر مع نظرة مستقبلية مستقرة للاقتصاد المصري.. ياتري اية الاسباب اللي اعتمدت عليها وكالة فيتش علشان ترفع تصنيف مصر الائتماني.. وهل الاقتصاد المصري علي الطريق الصحيح ولا اية الدنيا . خليكم معانا للآخر وهتعرفوا التفاصيل
الفترة اللي فاتت الاقتصاد المصري شهد حالة من التقلبات والخسائر الكبيرة جدا وده بسبب التغيرات الجيوسياسية اللي بتحصل في منطقة الشرق الأوسط والصراعات اللي بتحيط بدول المنطقة واللي لها تاثير مباشر علي اقتصايات الدول الموجودة في منطقة الشرق الأوسط، وواحدة من اهم وأبرز الدول اللي اتأثرت بالصراعات دي كلها هيا مصر واللي كان لها تاثير مباشر علي قطاعات كتيرة جدا خصوصا في ايرادات قناة السويس واللي تراجعت باكتر من 60% وقطاع السياحة واللي تراجع عن فكرة الوصول لـ30 مليون سائح بحلول 2028.
طيب ليه وكالة فيتش طلعت تقرير رفعت فيه تصنيف مصر وقالت أن الاقتصاد المصري ماشي علي الطريق الصحيح؟.
علشان نفهم الموضوع، لازم نعرف أن وكالة فيتش دي واحدة من ابرز وأهم الوكالات المتخصصة في المجالات الاقتصادية واللي المسئولة عن بحث تحليل الاقتصاديات الموجودة في كل دول العالم .
واحد من اهم الاسباب اللي اتعمدت عليها وكالة فيتش في رفع تصنيف مصر الائتماني هو انخفاض درجة المخاطر وتحسن الموقف الخارجي للاقتصاد المصري مع صفقة رأس الحكمة.
تاني الاسباب اللي اعتمدت عليها الوكالة في رفع التصنيف هو ارتفاع احتياطي النقد الأجنبي في البنوك المصرية واللي وصل لـ 11.4 مليار دولار في الـ 9 شهور الأولى من 2024 ووصل إلى 44.5 مليار دولار، ده غير الدعم اللي حصلت عليه مصر من بعض المؤسسات المالية الدولية، ده غير التوقعات اللي موجودة بوجود تدفقات استثمارية جديدة من دول عربية في الفترة اللي جاية واللي هتكون اغلبها عبارة عن صفقات استثمار سياحي علي غرار صفقة راس الحكمة.
تالت سبب اعتمدت عليه الوكالة لرفع التصنيف الائتماني لمصر هو تطبيق الحكومة المصرية لسعر صرف مرن للعملات الأجنبية قدام الجنية المصري وده كان حل سحري قضى على السوق السودا في التجارة بالعملات الأجنبية واللي كانت مستحوذة علي نسبة كبيرة من النقد الأجنبي اللي موجود في السوق، وكان القرار ده هو ضربة لاستعادة التوازن الاقتصادي الكلي.
السبب الرابع هو التوقعات الدولية اللي موجودة حاليا واللي بتاكد انخفاض التضخم في الفترة اللي جاية بعد معدل التضخم تباطئ من 26.4% في سبتمبر اللي فات ووصل الى 12.5% بنهاية العام المالي الحالي.
السبب الخامس، اللي رفع تصنيف مصر الائتماني هو برنامج الطروحات الحكومية واللي الحكومة شغالة عليه حاليا بالتعاون مع أحد المنظمات الدولية، واللي بتستهدف تخارج الحكومة من عدد كبير من القطاعات العامة، واخيرا برنامج الاصلاح الاقتصادي اللي الحكومة شغالة عليه حاليا مع صندوق النقد الدولي واللي بيهدف لعمل اصلاحات اقتصادية كبيرة في كل المجالات وجذب الاستثمارات وخفض الدعم على الوقود والكهرباء لضبط الإنفاق.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
