لو أنت بتدور على شقة جديدة سواء للسكن أو للجواز أو حتى عشان تدخرها لأولادك، فإيه هي أفضل الفرص، وهل في إمكانية تاخد الشقة دي بالتقسيط المريح وفي نفس الوقت تضمن أن فلوسك مش هتروح عليك ولا هتقع في فخ النصب، وإزاي تعمل كده، هنقولك كل التفاصيل في الفيديو ده.
دلوقتي، وزارة الإسكان بتستعد لطرح أضخم عدد من الوحدات السكنية في مجموعة من المشروعات التابعة للإسكان الاجتماعي، وهي: (دار مصر- جنه-سكن مصر)، وبيتم طرح 6575 وحدة سكنية في 15 مدينة جديدة جاهزين للتسليم الفوري.
ونقدر نقول إن أماكن الشقق أو الوحدات السكنية المطروحة هي 15 مدينة، وهي: ( القاهرة الجديدة- العلمين الجديدة- المنصورة الجديدةـ 6 أكتوبر- أكتوبر الجديدة- حدائق أكتوبر- بدر- العبور- الشروق- العاشر من رمضان- السادات- المنيا الجديدة- غرب قنا الجديدة- ناصر «غرب أسيوط»- دمياط الجديدة)، ولو حضرتك عايز تحجز، فلازم تقدم وتسجل على موقع مسكن اللي موجود على النت.
ولو عايز تعرف ميعاد فتح الحجز، فهيبدأ يوم 27 من شهر أكتوبر الحالي، وهيستمر الحجز لحد يوم 26 ديسمبر الجاي، وهيتم الإعلان عن الموعد ومكان القرعة العلنية بين المتقدمين، وكمان هيتم إعلان الأسعار والمساحات وأنظمة السداد وموقع الشقق المطروحة على موقع مسكن وده وفقًا لتصريحات وزارة الإسكان الاجتماعي.
طب بالنسبة لأسعار شقق الإسكان، هتكون على كام؟
بص يا سيدي، أسعار شقق (دارمصر- جنة -سكن مصر) بتتراوح ما بين 8 آلاف إلى 15 ألف للمتر الواحد.
أما الوحدات فهي متوفرة في مختلف المدن بمساحات متفاوتة، يعني مثلًا في مشروع (جنة)، فعدد الوحدات بيكون 409 وحدات بمساحات بين 100م لـ 150 متر مربع، ونفس القصة في القاهرة ومدينة 6 أكتوبر.
وبخصوص مشروع سكن مصر، فعدد الوحدات، بيكون 700 وحدة بمساحات تتراوح بين (106م² - 133م²) بالقاهرة الجديدة، و 435 وحدة بمساحات بين (106م² - 118م²) بحدائق أكتوبر، و300 وحدة بمساحات بين (106م² - 115م²) بمدينة أكتوبر الجديدة، وكمان في وحدات تانية متاحة في المدن زي المنيا الجديدة، وناصر (غرب أسيوط)، وغرب قنا، والشروق، وغيرها.
نيجي لمشروع دار مصر، فعدد الوحدات بتتراوح مساحتها بين (100م² - 150م²) موزعة بين العاشر من رمضان، السادات، وضيف على كل ده مشروع عمارات الحي السادس بمدينة بدر، اللي عدد الوحدات بتوصل لـ 1500 وحدة بمساحة 90م².
ومشروع روضة العبور، عدد وحداته 456 وحدة بمساحات بين (101م² - 111م²)، أما إسكان متميز، فبيشمل 83 وحدة بمساحات بين (104م² - 108م²) في دمياط الجديدة، و890 وحدة بمساحات بين (95م² - 99م²) في المنصورة الجديدة، وكمان 600 وحدة بمساحات بين (110م² - 133م²) في العلمين الجديدة.
وفي النهاية، لكل شخص ناوي يحجز الشقق، فلازم حضرتك تخش على الموقع الإلكتروني لمشروع مسكن محور، وتنزل كراسات الشروط وتطلع بنفسك على الأسعار، والمساحات، بالإضافة إلى أنظمة السداد، وتبدأ تحجز شقتك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
