عمرك فكرت إزاي موبايلك ممكن يتحول لمحفظة فلوس؟ أو تدفع في أي مكان من غير ما تمسك كاش أو حتى تطلع كارت البنك؟ طيب تعرف إن مصر دخلت رسميًا في عصر المدفوعات الرقمية بعد ما البنك المركزي فعل خدمات زي "أبل باي"؟ طب إزاي البنك المركزي بيقود التحول الرقمي وبيخلي الاقتصاد المصري أكتر مرونة وابتكار؟ وايه الجهول اللى عملها لتحقيثق الشمول المالي؟ .. فى التقرير ده هنقولك ايه اللى بيحصل
البنك المركزي المصري مش بس جهة تنظيمية.. ده بقى شريك أساسي في عملية التحول الرقمي اللي بتمر بيها مصر.. وآخر خطوة قوية عملها البنك المركزي هي إطلاق خدمة ترميز بطاقات الدفع على تطبيقات الهاتف المحمول.. وده معنااه إنك تقدر تربط كروت الدفع بتاعتك بموبايلك وتستخدمه كبديل للكارت نفسه
الأهم إن الخدمة دي فتحت الباب لتفعيل تطبيقات عالمية زي "أبل باي" في مصر اللي ناس كتير كانوا منتظرينها.. تخيل تروح أي محل أو سوبر ماركت وتدفع بس عن طريق إنك تلمس الموبايل بجهاز الـ POS.. الموضوع بسيط وسريع وآمن كمان
الشمول المالي بيعمل إيه؟
دلوقتي خلينا نربط القصة دي بالشمول المالي.. البنك المركزي بيشتغل بقاله سنين على إدخال أكتر عدد ممكن من المصريين للنظام المالي الرسمي.. وده بقى واضح جدًا في الأرقام.. في آخر تقرير رسمي عدد المواطنين اللي عندهم حسابات بنكية أو محافظ إلكترونية أو كروت دفع وصل لـ 56.2 مليون شخص .. وده مش رقم عادي.. ده بيمثل أكتر من نص الشعب المصري
الزيادة دي حصلت لأن الناس بدأت تستوعب إن المدفوعات الرقمية والمحافظ الإلكترونية مش بس رفاهية.. لا دي وسيلة حياة أسهل بكتير ومن ناحية تانية الدولة وفّرت الحوافز والبنية التحتية اللي تشجع الناس على استخدام الخدمات دي
طب السؤال هنا.. إزاي التحول الرقمي ده بيأثر على الاقتصاد؟
ببساطة توفير وقت وجهد وبدل ما الناس تضيع وقتها في طوابير البنوك أو الدفع الكاش، كل حاجة دلوقتي بتتم إلكترونيًا وفي ثواني.. كمان زيادة الأمان لأن عمليات الدفع الرقمي باستخدام تقنيات زي "أبل باي" والترميز بتقلل بشكل كبير من مخاطر السرقة أو التزوير.. وتقليل الاقتصاد غير الرسمي لأن لما الناس تبدأ تستخدم المدفوعات الرقمية كل التعاملات بتبقى مرصودة ومسجلة وده بيساعد الدولة في مكافحة التهرب الضريبي وزيادة الإيرادات.. بالاضافة الى تشجيع الاستثمار لأن وجود بنية تحتية رقمية حديثة زي دي بيشجع الشركات العالمية إنها تستثمر في مصر لأنها شايفة اقتصاد حديث ومتطور
طب ايه تاني ممكن يتم فى الاتجاه ده؟
البنك المركزي مش بيقف عند نقطة واحدة.. الخطوات الجاية هتكون مركزة على زيادة انتشار الأجهزة اللي بتدعم المدفوعات الرقمية (POS) في كل حتة في مصر وتوسيع الشراكات مع الشركات التكنولوجية الكبرى.. وكمان المركزي مش ناسي يدعم الشركات الصغيرة والمتوسطة اللي هي عصب الاقتصاد دلوقتي أي مشروع صغير يقدر يستفيد من خدمات الدفع الإلكتروني بسهولة ويقدر يوصل لعملاء أكتر من غير ما يكون عنده بنية معقدة
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
