هل صندوق النقد الدولي هيزود قرض الـ 8 مليار دولار لمصر؟ وهل ممكن نشوف تسهيلات أكتر بخصوص القرض؟ وإيه اللي خلى الحكومة المصرية تطلب إعادة النظر في البرنامج؟ كل دي أسئلة بتدور في عقول ناس كتير.. في الفيديو ده هنحاول نقولك إيه اللي بيحصل بالظبط وايه رأي صندوق النقد فى مطالبات زيادة برنامج التمويل المقدم لمصر.
في الأيام اللي فاتت كان فيه كلام كتير حوالين مدى إمكانية رفع صندوق النقد لحجم القرض المقدم لمصر خصوصا بعد التصريحات اللي أدلى بيها مدير إدارة الشرق الأوسط وآسيا الوسطى في الصندوق الدكتور جهاد أزعور.. الراجل ده قال بكل وضوح إن برنامج الصندوق مع مصر لسه ماشي في خطواته وإن الكلام عن زيادة القرض دلوقتي سابق لأوانه
طب ليه بقى الموضوع ده بقى محط الأنظار؟
برنامج صندوق النقد لمصر اللي وصلت قيمته لحد دلوقتي لـ 8 مليار دولار اتعمل عشان يحقق نوع من الاستقرار الاقتصادي ويفتح الباب قدام الاستثمارات ويوفر فرص للنمو الاقتصادي
الدكتور أزعور أكد إن البرنامج بالفعل بدأ يحقق تقدمه وإن التحديات الاقتصادية اللي بتمر بيها المنطقة كلها بتأثر مش بس على مصرلكن على كل الدول.. وقال على الرغم من ده شايفين مؤشرات إيجابية بخصوص التضخم اللي بدأ فعلاً ينزل تدريجيًا وده مؤشر على إن الاقتصاد بيمشي نحو الاستقرار
من ناحية تانية، الرئيس عبد الفتاح السيسي كان ليه تصريحات مهمة جدًا بخصوص الاتفاق مع صندوق النقد.. الرئيس قال بصراحة إن الأوضاع الاقتصادية الإقليمية الصعبة اللي بنمر بيها لازم تبقى في حسبان المؤسسات الدولية وعشان كده هو شايف ضرورة مراجعة الاتفاق مع الصندوق، خاصةً لو البرنامج هيضغط على المصريين بشكل مش هيقدروا يتحملوه.. يعني الحكومة بتحاول تراعي الظروف الحياتية للمواطنين وسط التحديات الاقتصادية دي
وخلال أكتوبر الحكومة قررت ترفع أسعار الوقود للمرة التالتة السنة دي بنسبة وصلت من 7 لـ 17%..وده كان جزء من التحديات اللي اتكلم عنها الرئيس.. عشان كده كلام السيسي عن مراجعة البرنامج بيعتبر رسالة لصندوق النقد، بإن البرنامج لازم يبقى فيه مرونة أكبر للتعامل مع التحديات الحالية وتخفيف الأعباء على الناس.
ومن الحاجات اللي زادت الضغط على الاقتصاد تراجع إيرادات قناة السويس بنسبة وصلت لـ 70% ما بين 4 لـ 6 مليار دولار في السنة وده ليه أثر كبير على الاقتصاد ككل.. والرئيس كمان قال إن الأزمة دي ممكن تمتد لسنة كمان وده معناه إن مصر هتحتاج لدعم أكبر الفترة الجاية عشان تقدر توازن التأثير ده.
المؤكد ان مصر بتسعى إنها تحافظ على استقرار الاقتصاد وتخفف من الأعباء على المواطنين واللي واضح من تصريحات صندوق النقد والحكومة إن فيه اتجاه للتعاون في مواجهة التحديات.. خلينا نتابع آخر التطورات الجديدة حوالين القرض وهنقول لحضراتك كل شوية ايه اللى بيحصل فى الكواليس
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
