ايه اللي هيحصل في سوق الصرف بعد صعود الدولار وايه التوقعات الصادمة لأسعار الدهب وايه مفاجآت المركزي الأخيرة للمصريين.. خليكم معانا للآخر وهتعرفوا التفاصيل
على مدار الأيام اللي فاتت مصر شهدت احداث اقتصاديه كتير وأغلبها احداث إيجابية بتعزز الثقة في الاقتصاد المصري وبخاصة في قطاع توطين الصناعات المختلفة في مصر لكن كان الحدث الأهم هو ارتفاع أسعار الدولار في تعاملات الأسبوع ووصوله الي حاجز ال50 جنيه في نهاية تعاملات الخميس في أغلب البنوك..
ورغم ارتفاع أسعار الدولار في التداولات الأخيرة لكن لسه مص في الوضع الآمن من ناحية توافر العملة الأمريكية وارتفاع الأسعار نتيجة طبيعية لتطبيق السعر المرن في سوق الصرف ودا بيأكد أن البنك المركزي المصري ملتزم بسياسة تحرير سعر الصرف وان الموضوع كله عرض وطلب ووراك سعر الدولار ينزل تاني ولو فاكرين تصريحات رئيس الحكومة الدكتور مصطفى مدبولي لما قال إن الدولار هينحرك بين 4و5% ومش هيطلع اكتر من كده بحكم السوق والعبرة زي ما قال المصرفي الكبير هشام عز العرب بتوافر الدولار مش بسعره.
ونروح لأسعار الدهب واللي تراوحت بين الصعود والنزول في الأيام الأخيرة وأغلقت السوق الخميس على ارتفاع ووصل سعر جرام 21 في نهاية تعاملات الخميس نحو 3710 جنيه وسجل سعر الدهب عيار 24 نحو 4240 جنيه وكل التوقعات العالمية بتقول إن المعدن الأصفر هيستمر في الصعود خلال 2025 وممكن يوصل الى 3 آلاف دولار للأوقية ودا معناه ارتفاعات جديدة في أسعار الدهب في مصر ودا لأن السوق المصري مرتبط بالسعر العالمي.
من الحاجات المهمة جدا اللي حصلت في الساعات اللي فاتت كان مفاجأة البنك المركزي المصري بإتاحة خدمة التحويل اللحظي لتحويلات المصريين في الخارج وإضافتها فورا إلى حساباتهم والخدمة دي بتشتغل من خلال شبكة المدفوعات اللحظية “انستاباي” واللي أطلقها البنك المركزي من سنة 2022 كجزء من خطته لتحسين نظم الدفع الإلكتروني..و الشبكة دي عبارة عن نظام متكامل بيخلّي كل عمليات التحويلات المالية تحصل لحظيًا على مدار 24 ساعة وطول أيام الأسبوع.. يعني لو حد من أهلك أو أصحابك في الخارج بعتلك فلوس في أي وقت الفلوس هتوصل لحسابك البنكي فورا وتقدر تصرفها في لحظتها سواء من فروع البنك بتاعك أو من خلال ماكينات الصراف الآلى المنتشرة فى كل شوارع مصر
وكمان سوق الاتصالات في مصر شهد تطور غير مسبوق بطرح شركات الاتصالات لشريحة ذكية جديدة هتغير مفاهيم الاتصالات القديمة وبدأت شركات المحمول في مصر بيع شرائح الاتصالات الإلكترونية eSIM للعملاء في فروعها من اليوم الخميس وحددت السعر ب 350جنيها ، بينما تبلغ رسوم انتقال العميل من شبكة لآخري بنفس الرقم علي الشريحة 300 جنيه
الخبر السار اللي اسعد ملايين المصريين في الساعات الأخيرة كان زيادة قيمة المعاشات والتأمينات والمفاجأة أعلن عنها اللواء جمال عوض رئيس مجلس إدارة الهيئة القومية للتأمين الاجتماعي برفع الحد الأدنى لأجر الاشتراك التأميني إلى 2300 جنيه بدلًا من 2000، والحد الأقصى إلى 14500 جنيه بدلا من 12600 ألف جنيه، وهيتم التطبيق من أول يناير اللي جاي.
وقال عوض إن الزيادة الجديدة هترفع الحد الأدنى للمعاش علشان يوصل لـ 1495 جنيه بدل من 1300 جنيه، وهيرتفع معاها الحد الأقصى للمعاش إلى 11600 جنيه بدل من 10080 جنيه، وده خاص بالعاملين اللي متأمن عليهم واللي هتنتهي خدمتهم بداية العام اللي جاي .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
