اشتكى الفنان حسان العربي من الأزمة التي تواجه العديد من نجوم الفنان خلال هذه المرحلة؛ حيث يعاني الكثيرة من قلة العمل، قائلا: “في ناس كتير قاعدة في البيوت ومفيش حد بيشتغل، ومجموعة بس من النجوم اللي بيشتغلو سواء في المسرحيات في السعودية أو الأفلام او المسلسلات”.
رأي حسان العربي في تجارب البلوجر في التمثيل
وأضاف خلال تصريحات خاصة لـ مصر تايمز: “البلوجر هما للي بيشتغلو والناس للي عندها متابعين كتير، ف اللي دارسين ومتخرجين مش بيلاقو شغل يشتغلوه، وف نفس الوقت محدش بيبعتلهم، بيبعتو لناس معينه”.
كما تحدث حسان عن تجارب البلوجر في التمثيل وقال: “في ناس كبيرة عندها خبرة وفاتحة بيوتهم من خلال التمثيل، وان ازاي البلوجر هما اللي بيشتغلو مع ناس عندها خبرة، وهما عندهم حاجات تانية يقدروا ينجحوا فيها ويجيبو منها فلوس”.
وتابع: “لو حد عنده خبرة تمام يشتغل بس مش يبقي كله كدا بلوجر، يعني بلوجر عشان عنده متابعيين يشتغلوا والناس التانية مش لاقية تاكل عيش!”.
حديث حسان العربي عن المشاريع الخاصة
واستكمل حسان حديثة عن المشاريع الخاصة وقال: “انا مقدرش اعمل مشروع انا مش باخد ملايين عشان اقدر افتح مطعم او كافية”.
وأضاف: “ان ناس كتير بتقول انزل وشوف، طب فين القنوات اللي انزل واشوف فيها واقول انا اهو، انا ناس كتير عارفاني وبتوقفني تتصور معايا وتكلمني”.
واستكمل: “كان زمان الواحد بيشتغل في مسرح وفي مسلسل وفي كل حته وكذا عمل حتي لو باخد فلوس قليلة بس الحكاية كانت شغالة، انما دلوقتي الحكاية مش شغالة”.
وتابع: “في ناس ممثلين وممثلات انا معرفهمش في الوسط الفني”.
رأي حسان العربي في التيك توك
وتحدث حسان عن راية في التيك توك و ما يفعله الممثلين عليه وقال: ” في ناس بتقول ادخل علي التيك توك واشتغل لكن انا مش بتاع تيك توك، بحط حاجات وصور وفديوهات عادية، لكن معنديش استعداد اعمل حاجه حد يقول عليها اي التهريج اللي بيعملو دا او اقلل من نفسي، لازم الواحد يحترم نفسو عشان الاخرين يحترمونا”.
حسان العربي يتحدث عن أخر عمل له
وتحدث حسان عن اخر عمل له: ” انا من ساعت المداح لحد دلوقتي بشتغل كضيف شرف او اعمل حاجه بسيطه اوي، وببقي عايز اعمل حاجات كبيره ولكن مفيش، ومع ذلك كلمت ناس وبعتلهم حاجات وفديوهاتي وصوري وفي شاف وفي مشافش وفي ناس كلمتهم وردو وفي ناس مردوش”.
وتابع: “اصل اكيد الواحد مش هيشتغل بالعافيه، مش هنمسك مخرج ونقولو شغلني وهيشغلني انهاردا او بكره”.
واختتم حسان حديثه معبراً عن المعاناة التي يعانيها كثير من الفنانين وقال:” احنا ف مأساه كبيره اوي وللاسف مش عارفين نطلع منها ازاي”.
