استغاث مواطن من شركة تاج مصر العقارية ، بعد تجربته معهم وتعنتهم فى بيع وحدته ، على حد قوله.
وقال صاحب المشكلة مع شركة تاج مصر ،” تجربتي مع شركة تاج مصر مشروع ديجويا الشيخ زايد الجديدة .. من حوالي سنة تعاقدت معاهم على محل تجاري بهدف الاستثمار، ومن وقتها كان فيه اتفاق صريح من الشركة (حسب كلام السيلز والديركتور) إنه في حالة البيع لأي مشتري جديد مفيش أي مشكلة حتى لو اليوم التالي للتعاقد.
وتابع،” سألتهم كمان عن بند مكتوب في العقد بيقول إنه لازم أرجع للشركة للموافقة في حالة البيع، وبرضو أكدولي إنه مجرد بند شكلي مش أكثر.
واستطرد ،” بعد فترة قررت أبيع الوحدة، وقدّمت مشتري للشركة، لكنهم رفضوا التنازل بحجة إن نظام إعادة البيع (Resale) لسه متفتحش. انتظرت مدة طويلة بدون أي جديد، ولما جبت مشتري تاني، كان الرد برضه بالرفض وقالوا لو حصل تنازل لازم أدفع 5٪ من قيمة الوحدة، ومع ذلك مش بينفذوا أي حاجة والأسوأ من كده إنه لما جبت مشتريين معايا للشركة، بدأوا يكلموا المشترين دول مباشرة عشان يعرضوا عليهم الشراء من الوحدات المتاحة عندهم بدل ما يشتروا مني وفي الآخر بعتولي إخطار بفسخ العقد.
وقال،” لما قعدت مع محامي الشركة قال لي إن السيلز بيقولوا أي حاجة عشان يبيعوا، وهددوا بخصم كل المدفوع على مدار السنة لو حبيت ألغي الوحدة.
واختتم مشكلته قائلا،” نصيحة لأي حد بيفكر يشتري أو يستثمر معاهم فكر كويس قبل ما تاخد أي قرار، لأن من خلال تجربتي وتجارب ناس تانية واضح إن مصلحة العميل آخر أولوياتهم. في شكاوى وبوستات كتير من متضررين بسبب تعاملهم، فكر كويس قبل أي خطوة”.
وكانت قد تصدرت شكاوى عملاء شركة تاج مصر العقارية موقع التواصل الاجتماعي ” فيس بوك” بعد تحذيرات كثيرة من العملاء .
كما اشتكي إحدي العملاء من طريقة تعامل الموظفين بالشركة قائلة،” موظفون شركة تاج مصر بيشتمو العملا بتوعهم ومعايا الاثبات”.
كما حذر عدد من العملاء غيرهم ، متابعين،” فى جروب كبير للمتضررين من تاج مصر
وفى حوالى الف عميل رافعين عليهم قضايا بسبب عدم التسليم وفسخ عقود بدون وجه حق وفى عميله تم الاعتداء عليها داخل مقر الشركه ومعانا محضر بالحادثة.. وناس ممنوعين من الريسيل بسبب عدم دفع اتاوه المرافق المزعومه ومانعين معاينه الوحدة قبل التسليم عايزك تمضى بالاستلام من غير متشوف الوحدة وطبعا دا بعدهم”.
