هو إيه اللي بيحصل في سوق صرف العملات الأجنبية؟ وليه الدولار بيواصل الارتفاع وبيسجل مستويات تاريخية؟ وهل فيه امل ان الدنية يسترد قيمته قريب ولا الموضوع ده صعب؟ .. خلينا نفهم مع بعض اللي بيحصل في سوق الصرف وتعرف التوقعات بتقول إيه.
النهاردة في التعاملات الصباحية الجنيه سجل مستوى قياسي جديد قدام الدولار.. يعني ببساطة الدولار تجاوز حاجز الـ51 جنيه لأول مرة
وفي بنك أبوظبي الإسلامي كان أعلى سعر للشراء 50.95 جنيه، والبيع بـ51.04 جنيه.. وبنك فيصل وبنك الشركة المصرفية (SAIB) كانوا بنفس الأرقام تقريباً.. حتى البنك المركزي أعلن إن سعر الشراء وصل لـ50.87 جنيه، والبيع لـ50.96 جنيه.
طب الحكومة شايفة ده إزاي؟
رئيس الوزراء، مصطفى مدبولي، في اجتماع مع محافظ البنك المركزي ووزير المالية، أكد إن التنسيق شغال على أعلى مستوى عشان يضمنوا توفر الاحتياطيات من السلع الأساسية في السوق.. يعني الهدف الأساسي حالياً هو توفير المنتجات وزيادة المعروض منها مع محاولة تهدئة التضخم اللي بيضغط على جيوب الناس
محافظ البنك المركزي كمان قال إنهم بيشتغلوا على توفير النقد الأجنبي اللازم للاستيراد سواء للسلع الأساسية أو المنتجات البترولية.. وكل ده بالتوازي مع دعم القطاع الخاص لتحفيز النمو الاقتصادي
لكن خلينا نتكلم شوية أرقام.. البنك المركزي أعلن إن احتياطي النقد الأجنبي وصل لـ46.95 مليار دولار نهاية نوفمبر وده رقم كويس صح.. لكن هل كفاية قدام الطلب العالي على الدولار؟
هنا بقى بتدخل التوقعات الدولية.. وكالة ‘فيتش سوليوشنز’ شايفة إن الدولار مش هيكمل ارتفاعه بنفس السرعة لكن في نفس الوقت صندوق النقد الدولي عنده كلام تاني.. الصندوق متوقع إن الدولار هيكسر مستويات قياسية جديدة في السنة المالية 2024-2025، وكمان فى 2026
طب الكلام ده معناه إيه لينا؟
ببساطة ارتفاع سعر الدولار بيعني إن تكلفة الاستيراد هتزيد وبالتالي أسعار السلع والخدمات هتفضل في ارتفاع.. ده هيضغط أكتر على ميزانية الأسر المصرية اللي أصلاً متأثرة بارتفاع التضخم
والسؤال المهم هل هنشوف حلول جديدة قريب؟ ولا الموضوع هيفضل معتمد على سياسات تقشفية ومحاولات لضبط السوق؟.. الحقيقة المشهد واضح سوق الصرف بيعيش مرحلة صعبة والجنيه المصري في مواجهة تحديات كبيرة..و الأهم دلوقتي إننا نفهم اللي بيحصل حوالينا عشان نقدر ناخد قرارات مالية صح في حياتنا اليومية وافتكر دايماً إن الاقتصاد مش مجرد أرقام ولا نسب وليه تأثير مباشر علينا كلنا
