علقت الصفحة الرسمية لمحال بيع منتجات الألبان “بلبن” على عمليات الإغلاق التي تلاحق فروعها بعدد من المناطق؛ قائلة: “الغلق اللي حصل لفروع “بـ لبن” خلال الأيام اللي فاتت في مصر ماكانش له أي علاقة بحالات تسمم، ولا في أي بلاغ طبي أو تقرير رسمي بيقول كده اللي حصل هو غلق إداري لأسباب تنظيمية، وإحنا بنتعامل معاه بكل احترام وشفافية”.
وأضافت: “لكن اللي بيحصل حوالينا الأيام دي مش مفهوم، فيه موجة كبيرة من الكلام، وفيه تركيز غير معتاد، وفيه تساؤلات حوالينا إحنا كمان مش لاقيين لها إجابة واضحة، وبعض الصحف والمنصات اختارت العنوان اللي يولّع، من غير ما تتأكد، ومن غير ما تراعي الكلمة هتروح فين وهتعمل إيه ونسيوا ان بـ لبن” فيه أكتر من 25,000 شخص بيشتغلوا بشكل مباشر”.
واستكملت: “ده مكان اكل عيشهم ورزقهم وبكل بساطة ممكن تتسبوا في قطع عيشهم وده مش موضوع “مين بيحب البراند ومين لأ”، ولا “مين شايفه يستحق ومين شايفه لا”، ده موضوع أرزاق… أرزاق ناس كتير ناس مالهاش اي ذنب في ده”.
ووجهت الصفحة الرسمية لمحال “بلبن” رسالة قائلة: “فـ بالله عليكم…اتقوا ربنا في الكلمة، وفي النقل، وفي التفسير، لأن قطع الأرزاق مش لعبة، ولا المفروض يكون تمنه إن حد يركب تريند أو يجمع تفاعل الموجة اللي علينا عالية… واللي بيحصل مش بسيط. وإحنا بنسأل نفس السؤال اللي كل الناس بتسأله: ليه؟”.
وأوضحت: “احنا مش ملايكة، بنغلط وبنصلّح، بس اللي بيحصل دلوقتي أكبر من مجرد ملاحظة أو مخالفة.
فيه شيء مش مفهوم إحنا مش فوق المحاسبة، ولا بندوّر على مجاملة، لكن اللي نطلبه بكل احترام: شوية عدل… وشوية رحمة”.
وأصدر المهندس عادل النجار محافظ الجيزة قرارًا بغلق 12 منشأة لبيع منتجات الألبان والحلويات تابعة لسلسلتَي محلات “ب لبن” و”بلين” بأحياء العجوزة والعمرانية وجنوب الجيزة والوراق وإمبابة ومدينة السادس من أكتوبر ومدينة الشيخ زايد ومركزي الحوامدية والبدرشين.
وجاء قرار المحافظ استنادًا إلى تقرير مديرية الشؤون الصحية بالجيزة وإدارة مراقبة الأغذية، وذلك لإدارة الفروع دون ترخيص وعدم حصولها على التصاريح اللازمة للمزاولة.
ويأتي ذلك في إطار حملات التمشيط والرصد بمحافظة الجيزة للتأكد من التزام المحال العامة والمطاعم بالحصول على التراخيص اللازمة للعمل والوقوف على سلامة الأغذية والمنتجات المقدمة للمواطنين حفاظًا على السلامة العامة.
