جدد عدد من ملاك مشروعات شركة المراسم للتطوير العقاري ، وقفتهم الاحتجاجية ضد الشركة ، اعتراضاً على قرارات أوضحوا إنها تضر بهم.
وقال عدد من الكلاك فى بيان مشترك لهم، “نحن مجموعة من ملاك الوحدات في أحد مشروعات شركة المراسم للتطوير العمراني، وبنواجه مشاكل وتجاوزات واضحة من جانب إدارة الشركة.
وتابعوا فى بيانهم ” وده ملخص لأهم النقاط:
1. سوء التعامل ورفض التواصل:
آخر مرة حاولنا نتقابل مع ممثلي الشركة، تم رفض مقابلتنا، واستدعوا الشرطة وعملوا بلاغ في النيابة، بدل ما يقعدوا معانا ويناقشوا مشاكلنا.
2. تغيير في المواصفات والأسعار:
تم حذف التكييفات من مواصفات الاستلام المتفق عليها.
تم زيادة أسعار وحدات الدور الأرضي بزعم زيادة مساحة الجاردن، رغم إن الزيادة دي غير مرغوب فيها من الأساس.
3. تعديل غير عادل في خطة السداد:
الشركة غيرت الـ Payment Plan وخلوها front loaded، وده معناه إننا بندفع أغلب المبلغ في بداية التعاقد، وده ضغط كبير على الملاك.
4. غرامات بدون مبرر:
بيتم فرض غرامات تعسفية على الملاك بدون أسباب واضحة أو منطقية، وكأنها وسيلة لزيادة دخل الشركة.
5. قيود مجحفة على البيع:
تم فرض شرط يمنع البيع لمدة سنة بدون أي مبرر.
بعد انتهاء السنة، اشترطت الشركة إن أي بيع يتم لازم يتعرض عليها الأول، رغم إنها لا تشتري من الأساس لكنها بتعطل وتماطل وترفض الطلبات.
تم رفض عمليات بيع بحجة إن “المالك الجديد غير مؤهل للكمباوند”، وده تدخل غير مقبول في حقوق الملكية.
6. تمييز واضح ضد الملاك الحاليين:
شركة المراسم قدمت عروض للعملاء الجدد بأسعار أفضل ونظام سداد على 10 سنوات، رغم إننا اشترينا بأسعار أعلى وشروط أصعب.
بدل ما تصلح الشركة أخطاء التسعير السابقة، قررت تسيب الملاك القدامى يتحملوا الخسارة.
7. إيقاف عملية البيع علينا تمامًا:
بعد انتهاء فترة الحظر، شركة المراسم طرحت عرض تقسيط مريح على 10 سنوات بدون زيادة كبيرة في السعر، وده خلى أي مشتري جديد يفضل يشتري من الشركة نفسها بدل ما يشتري من ملاك الوحدات، وبالتالي وقفوا علينا البيع تمامًا.
شكاوي ملاك شركة المراسم
وكان عدد من ملاك مشروعات شركة المراسم للتطوير العقاري قد استغاثوا بالشركة السعودية المسئولة عن المشروع فى مصر.
وقال المتضررون،” محتاجين اغاثة من شركة بن لادن السعودية بما يحدث بنا في مصر من مقركم في القاهرة شركة المراسم للتطوير العقاري التابع لكم نحن في اشد الحاجة الي اغاثة اغيثونا بما عملوا فينا في مصر ،،، هل شركة بن لادن بتصدر اوامر الي المسئولين في مصر انهم يكلموا للملاك الشرطة لانهم بيطالبوا في حقوقهم و مفيش اي مسئول قابل يتكلم معانا و بيتعاملوا معانا معامله العبيد و ليس كملاك و لينا حقوق ،،،. الحقونا يا شركة بن لادن،،، عايزين مسئول نتكلم معاه يكون عنده رحمه فينا”.
وكان قد عبر عدد كبير من ملاك مشروعات شركة المراسم للتطوير العقاري عن غضبهم بعد قرارات الشركة الأخيرة، مما دفعهم للاحتجاج أمام مقر الشركة، وذلك على خلفية التسهيلات والطرح الجديد من قبل الشركة ليقع بذلك ضرر على الملاك والمتعاقدين القدامي، على حد قولهم.
وقال أحد المتضررين،” شركة مش بتراعي الملاك اللي وثقو فيهم و اشترو منهم من سنه ونص و المكافأه اللي الاداره عملتهالهم انهم نزلو لونش جديد و نزلو في السعر و على عشر سنين بدل تمانية”.
وتابع متضرر اخر،” الموضوع مش تخفيض السعر الشركة غيرت اتفاقتها عن ماتم التسويق لة فى اللونش اتفقنا على الوحدة كاملة التشطيب بالتكيفات واقساط متساوية لكنهم كتبوا العقود بعدها ب٤شهور بعد دفع المقدم ال٥% ولغوا التكيفات وغيروا فى قيمة وتاريخ الاقساط”.
وقال متضرر ثالث،” دمروا كل الملاك اللي اشتروا معاهم في اكتوبر فى مارفيل نيوزايد ودي اول شركة في مصر تنزل السعر وفضحوا نفسهم قدام الناس و نزلو السعر من ١١٠ الف لحد 70 الف و دمروا اللي اشتروا معاهم .. الشراء والاستثمار معاهم خطر كبير”.
