حذر عدد من الملاك من التعامل مع شركة عربية للتطوير العقاري ، بسبب عدم وجود بنية تحتية جيدة فى عمارات ومباني الشركة .
الملاك المتعاملين مع شركة عربية للتطوير العقاري
وقال عدد من الملاك المتعاملين مع شركة عربية للتطوير العقاري، مشاكل البنية التحتية لا تنتهى مع شركة عربية للتطوير العقاري فى كومباوند West Town (ويست تاون) معلومة مبدئية كده العمارات كلها لحد المرحلة الرابعة كانت مبنيه كلها سوا واسمها أرابيانو عادى حتى السكان الحاليين كلهم عقودهم و عناوينهم فى البطايق أرابيانو.
و تابع،” لكثرة المشاكل اللي الشركه عاملاها مع السكان علي الرغم من المحاولات المتكررة من جانبنا للتطوير وإصلاح المشاكل المتكرره في العماير حتي لو بزيادة مادية على وديعة الصيانة بمقابل التحرك الفعلى للشركه على ارض الواقع ووضع خطة زمنيه للاصلاحات ولكن في كل مره تقابل بالرفض بدون أي مبرر او سبب واضح.
واستطردوا،” فجأة قررت الشركه انها تغير الواقع بأمور ظاهرة فقط (دهان العماير باللون رمادي وتغيير الاسم على البوابه الرئيسيه فقط ل ويست تاون “منذ اسبوعين” وتشطيب كام شقة كده أى كلام عشان يبيعوا اغلى) بدون حلول جذريه لمشاكلهم عشان المشترى الجديد ميلاقيش اى معلومات على السوشيال ميديا و يفتكر انه مكان جديد.
وقالوا،” العمارات كلها منشعة من غير ما اى ساكن يدخلها والانترلوك بيهبط فجأة ومفيش اى صيانه ليه ومبالغ باهظة للصيانه بدون اى خدمة هتتقدملك اول ما تسكن واداره غير مسؤله كل هدفها جمع مبالغ جزافيه من السكان بدون النظر لمشاكلهم أو حتي الوصول لحل مشترك ما بين إدارة المكان والملاك ومبالغ باهظه للاستهلاكات المياه لأن مفيش عدادات مياه غير على بوابة الكومباوند”.
وقال ملاك آخرين، ” تقوم شركة عربية للتطوير العقاري بإختيار شركات تسويق غير مهنية تقوم بنشر صور غير حقيقة للموقع وتبالغ فى الوصف ولذا وجب التنويه “.
يذكر أن هذه ليست المشكلة الأولي التى تحدث عنها العملاء ،فكان عدد من المتعاقدين مع شركة عربية القابضة للتنمية والتطوير العمراني ، قد استغاثوا منهم من تم فسخ التعاقد معه دون اخباره ومنهم من يستغيث بسبب سوء الخدمات بعد التعاقدات والشراء.
قالت إحدى المتضررات: “اشتريت سنة ٢٠١٨ وحدة في كومباوند صن كابيتال التابع للمهندس طارق شكري شركة عربية وبعد دفع مبلغ كبير حصلي ظروف مادية قهرية واتأخرت علي قسطين بكلمهم علشان ادفع أقساطي المتأخرة قالولي تم فسخ العقد الكلام دا تم في 2021 وحاولت معاهم كتير اخد وحدتي وادفع متأخراتي بالغرمات حتي رفضوا بس كانوا بيقولوا هنشوف ونرد عليك وطبعا مكنش في اي رد أنا اللي كنت بحاول اتواصل معاهم كتير وفي الاخر بعد ما فقدت الأمل قولتلهم تمام عايزه فلوسي وطبعا بيماطلوا كتير ولا عارفة لحد الآن ٢٠٢٥ اخد اي فلوس دفعتها”.
وتابعت: “اتكلمت مع أ عمرو شكري نجل المهندس طارق شكري واتحايلت عليه تخيلوا اتحايلت عليه اخد فلوسي وفي الاخر عملي بلوك حسبنا الله ونعم الوكيل فوضت حقي عند الله”.
وقال متضرر آخر: “انا أحد السكان و دي حقيقة الشركة غاية في الاهمال و كل الكلام اللي بيقولو عن الجنة اللي هتعيش فيها كدب و الامن بيسرق من الجراجات و الشركة مش بيهمها غير تحصيل الفلوس و فروق صيانات في حين ان الصيانات زي الزفت اسوء شركة تطوير عقاري في مصر Arabia Holding”.
وأكد آخر: “الناس اللي بتفكر تشتري في زايد خلو بالكو من كومباوند جديد اسمه elora تابع لشركة عربية نفسها اللي احنا بنعاني منها في جاليريا.ما حدش يقرب منهم ومن عقودهم ومن طريقتهم السيئة في الادارة والتحكم في الملاك وكأنهم عبيد عندهم”.
